الرئيسية

مقالات وآراء

خمسه مع ٢٠٢٥ .......

12/29/2024 - 18:00 PM

منى حسن *

خمس ايام و‏حاتبتدى سنة جديده، السنه لضمه فى فرق ثانيه يومها، وهوه هوا تكملة الأيام.. ولكن مع بداية سنة بتقلب رقم.. 25!

رقم مجموع السنه، 9 مليان ايجابيه ويساعد في إنهاء كتير من الدورات القديمة والتحكم بمسارات بمنظور وتأثير ايجابى..

كل واحد بيوضب نفسه لعاوز يعمل ايه ‏أو بيحاول يقرر حياته حتكون إزاي فى السنة.. أمانى وقرارات وحسب ظروفها ان كأن تتحقق.

كمان أيام وخمسة وعشرين كل الناس تهنيء بعض لبدايتها وبتتمنى لكل واحد دايما تكون فيها حاجات أفضل من اللى قبلها..

لما افكر عايزة ايه من السنة الجديدة الاقى حاجات طبيعيه المفروض وجودها.. عايزه راحه البال اللى تايهه وسط الضغوط، عايزه هدوء، عايزه سلام، عايز زرار الشر ينطفى، عايزة زرار الحروب يتلغى، ‏عايزه ينفتح طاقه للانتاج، عايز أشوف عندنا منتجات جوده عاليه، وزراعة في ارضنا يكفينا ونصدرها، وصناعة جودتها ننافس بها منتجات العالم، عايزة الشوارع تكون متسفلته، عايزة الزحمة تقل و تتنظم، عايز الناس تلتزم بالنظام في السواقة.

عايزة الناس اللى بتمشي وسط الشارع ترجع للرصيف ويتعدل للاستعمال، عايزة واجهات البيوت تتدهن، عايزة الشوارع يبقى فيها شجر ورود ويبقى عندنا جنايين أكثر، عايزة المحلات تدخل تلاقي كل حاجة أنت عاوزها هتلاقيها. عايزة الاستيراد يبقى مفتوح لانه حايعمل انتعاشة، عايزة التجار يبطلوا جشع، عايزة الأسعار توقف تتفرمل، عايزة المنتجات اللي موجودة في السوق يكون عليها رقابة، عايزة الناس تراعي بعضها.

عايزة الجار يراع جاره، نفسي أسمع لغه الاحترام اللي كانت موجودة واللي اتلغت، نفسى برقع الحياء يرجع تاني، نفسى الشباب يكون عندهم هدف ويحققوه ويلاقوا طريقه سهله لتحقيقه، نفسي الاب والأم يرجعوا ياخدوا بالهم من عيالهم ويركزوا فى تربيتهم وأخلاقياتهم، نفسى كل واحد يلعب الدور بتاعه وبس ويتقنه قبل ما يتدخل في أدوار ثانية مش بتاعته، نفسى نظام و فكر التعليم يتطور ويتغير وتكون بناءه، نفسى فى منظومه العلاج تشمل وتغطى كل فرد، عاوزه حاجات كتير غير، عاوزه بقال وسرجه وعطار وخردوات، محلات كانت بخيرها وكل حاجه ليها طعم حتى اللعبه!

بس ده نفسي فيه كل يوم، مش مستنية سنة تقلب عشان يبقى نفسي!..

اليوم بيجرى بسرعة جدا والسنة بتجرى أسرع، وإن كان نفسي يرجع الوقت ياخد وقته مايسرعش..

24 كانت قاسيه فيها ألم فيها حزن فيها ناس عزيزة مشيوا حاتفضل عايشه معانا و جوانا، فيها احداث غير مفهوم، وللكن هو ايه مفهوم بالحق الأيام دى.. ولكن كمان كان فيها حاجات حلوة، وأتمنى أن الحلو يزيد لأن الحلو هو وقود الحياه اللى بيخليك تقدر تكمل ولو حتى من الذكريات..

ولو حتمنى فهو الهدوء والسلام وراحة البال،

ووقود الحياة اللي هي الحاجة الحلوة..

السعادة والأمان.. امنيه للعالم كله

* مصريه