الرئيسية

مقالات وآراء

من خواطرى.. القلوب الدافيه.. رزق

05/29/2025 - 23:05 PM

بقلم منى حسن

الحب حكايه وحياه بمعانيها كلها ضحكه ولهفه ودقه قلب سريعه وكركبه بطن ودمعه وقلق وبهجه بتغيرك من جوه ونظرتك حواليك الحب بيخطبك فجاءه من غير مقدمات، بتحس بيه فى ثانيه، كيميا ربانية تحصل من غير تفسير.

الحب، النظره قبل الكلمه، الفعل قبل الكلمه، الإحساس قبل الفعل، احلى حاجه فى الحب انه من القلب مش حاجه تتشرح اكتر منها تتحس ...

الحب يملاك أمان، بهجه وسكينه.. هو ده الحب الحقيقى

الحب هو الدافع والطاقه الايجابيه لتخطى الألم والضغوط المليانه حواليك وفى حياتك.

اللى بيحب، كلامه كله موده وحايسيب الدنيا لياخد باله منك ... مش حايكون انانى على حسابك، حا يقدر احتياجاتك ويديها بعطاء، ويحس بيك من غير ماتطلب، حايجبر خاطرك ويوقف جنبك فى أصعب الأوقات، حتى لو فى مرض ممكن ينسي نفسه لحد ما يشوفك فى احسن حال، اللى بيحب مش مستني مقابل بس فى عينيه يقدرك اكتر لما تقدره..

الحب كل حاجه حلوه عندك عاوز تديها للحبيب للصديق او لاهلك

الحب كله عطاء وصدق وموده وراحه غير مرئيه لكنها محسوسه بالافعال

الحب قاموسه المصلحه ملغيه، عدم التقدير وعدم الاحترام ملغي، الغدر والخيانه ملغي، كسر الخاطر ملغي... بلاش تضايق حد قلقان عليك، ومش بيرتاح الا لما يطمئن عليك وعلى حالك وصحتك..

حلوة كلمة " ما بزعلش منك " بس الأحلى منها مايهونش عليه زعلك

لأن المعاملات اللطيفه هى اللى فيها هات وخد، وفيها فلفل وشطه وآخرها ضحكه، وحاجه حلوه اللي بيسمعوا بعض، وكلامهم يبقى ود حتى لو اختلفوا، يحترموا آراء بعض، يتعاملوا بخوف على شعور بعض، مايهونش عليهم زعل بعض، بيحنوا لبعض، وبيطمنوا بعض، بيسندوا ويساعدوا بعضهم، بيرفعوا من بعض، بيشجعوا بعض، الحب إخلاص وتسامح

فى فرق كبير مابين الحب للمصلحه والحب الوقتى والحب الحقيقى

لان الحب بجد له قدسيه واحترام، مش اي حد يقولك انه بيحبك تصدقه، لانه مش كلمه، لكن الفعل والوقت مع الإحساس والشواهد من الأفعال هو الحَكم، لتفريق الفرق!

ساعات لما تلاقى حد عملك حاجه من غير ماتطلب او بتمر بمشكله، وفجأة تلاقي حد ممكن ما يخطر لك على بال مهتم بيك، ويكلمك يسأل عليك، ليطمن لاحساسه الجميل بانه ده وقت ليسمعك، مش لان عنده فضول

حاتعرف تفرق وحاتقدره..

جميل تقدير اللى حس بيك واهتم وفكر انه يشاركك ويقف معاك حتى لو بكلمه..

كتير فى الحياه تزييف الحب، خد بالك من ان تدى حد اكتر من حجمه، وراقب تصرفاته، وحد من فضوله، وأيه ورا السبب، لانها بتكون لأسباب كتيره، انت فى غنى عن مردودها السلبى عليك سواء نفسيا او عاطفيا، لان أحيان كتيره حتصدمك!

اطول العلاقات اللى فيها مساحه حتى ما بين ٤ حيطان، ولكن بوجود وضوح وثقه، والمعاملات باحترام والمسانده البناءة وراحه للنفس..

الكلمه الحلوه دفى.. اللمسه دفى.. النظره دفى وان كانت اسرع فى ترجمه النفوس

احب الناس هم اللي تتسند عليهم و انت متأكد انهم مش حايخذلوك ...

صله الرحم والاخوات اللي دايما في ضهر بعض هما السند والامان

الحبيب والأهل والصاحب اللي تطمن لوجودهم و ماتخافش من غدرهم، هم نعمه

القلوب الدافيه المليانه العطاءه، و كلامهم وأفعالهم آمان وسكينه، كفيلة ان تخليك راضى فى حياتك حتى بضغوطها الصعبة

احساس حلو وشعور اجمل لما تشوف فى نظراته آد ايه انه فخور بيك وتشجيعه ليك بحب

خلى هيه دى دايره حياتكم، كمان بمردود قلوبكم الدافيه قدروهم، اجبروا خاطرهم، ردوا على افعالهم بالحب والعطاء وتمنوا لهم الخير

هو ده الحب الحقيقي

القلوب الدافيه.. رزق

* مصريه

منى حسن